Oh my soul

Ek het die boodskap onder die fotos as ‘n whats app boodskap hierdie Saterdag gestuur nadat ons op 21 September (wat ook ons 20ste huweliksherdenking is) bevestiging ontvang het dat my vrou borskanker het. Dit verklaar waarom ek verlede week nie geblog het nie. Wanneer siekte by ‘n geliefde of jouself gediagnoseer word verander jou prioriteite net eenvoudig. Dit beteken egter nie dat ek nie meer gaan blog nie – die blog is net nie meer so belangrik vir my nie.

Ek gaan ook nie elke keer wanneer ek blog iets hieroor sê nie. Susan is ‘n privaat persoon en hou nie daarvan om in die kalklig geplaas te word nie. Ek sal hopelik ook my humorsin behou alhoewel die siekte en behandeling soos o.a. deur Hester en haar dogter beskryf word nog op Susan wag en geen grap is nie. Ek wil julle aanmoeding om na die lied hieronder te luister. Dit is nie ‘n lied wat jou gaan probeer evangeliseer nie. Dit is woorde van ‘n persoon in stryd met homself.

Oh, my soul
Oh, how you worry
Oh, how you’re weary from fearing
You lost control
This was the one thing
You didn’t see coming
And no one would blame you though
If you cried in private
If you tried to hide it away
So no one knows
No one will see
If you stop believing

‘n Onlangse foto van die dames in my lewe en ons hieronder

Oh my soul you are not alone
There’s a place where fear
has to face the God you know

Goeiedag vriende.

Susan is gediagnoseer met borskanker.

Daar is geen verspreiding na haar organe of skelet en die kanker is beperk tot haar regterbors. Dit is egter ‘n kanker wat kan versprei en is tans reeds in die limfklier aan die kant van die bors nadat dit ontstaan het in ander dele van haar bors.  Aangesien die limfklier kontak het met die res van die liggaam gaan Susan vir ‘n aantal maande chemoterapie ondergaan, gevolg deur  ‘n operasie en daarna bestraling. ‘n Moelike pad lê voor en die prognose is dat die proses van behandeling ‘n jaar gaan duur. Die belangrikste is dat dit in ‘n vroeë stadium is en dus geneesbaar.

Ons besef dat daar binne ‘n geloofsgemeenskap verskillende sienings is oor die behandeling van kanker en die manier waarop God genees. God kan ‘n wonderwerk  doen en onmiddellik genees, maar ons weet ook dat niks ons van die liefde van God in Christus Jesus kan skei nie – ook in ‘n jaar van behandeling. Ons vertrou die mediese span. Susan het die onkoloog gekies omdat sy deur ondervinding in die mediese beroep weet dat hy resultate behaal.

Siekte met al die pyn en ongerief wat daarmee saam gaan bring ook ‘n geleentheid tot heling en genesing wat veel wyer strek as die siekte self.

Bid asb vir genesing, wysheid vir die dokters en geestelike en emosionele krag vir Susan maar ook vir my en die kinders. Op die oomblik is ons almal sterk en positief maar daar sal moontlik dae kom wanneer ons herinner sal moet word dat wanneer ons swak is, is God sterk.

Die uittreksel hierbo is uit die lied Oh my soul wat deur Mark Hall leier van die groep Casting Crowns geskryf is op die dag wat hy uitgevind het hy het kanker met psalm 43:5 as inspirasie. Sy nier is chirurgies verwyder en na behandeling is hy kankervry.

Luister daarna hier (en dink aan Susan terwyl jy daarna luister):